Uchambuzi wa kitabu cha leading through inflation by Ram Charan

Uchambuzi wa kitabu cha leading through inflation by ram charan.

MIKAKATI YA KUENDESHA KAMPUNI WAKATI WA UCHUMI MGUMU, MDORORO NA MFUMUKO WA BEI.

Kumhusu Mwandishi

Ram Charan ni mshauri wa biashara na uongozi mwenye uzoefu wa muda mrefu wa kufanya kazi na CEO na viongozi wa mashirika mbalimbali.

Katika kitabu Leading Through Inflation, anatuelekeza namna viongozi wanavyoweza kuiongoza kampuni wakati wa mfumuko wa bei na mazingira magumu ya kiuchumi.

Mazingira kama haya yanahitaji CEO kubadili namna anavyofikiri na kuendesha kampuni. Mikakati iliyokuwa ikifanya kazi wakati wa uchumi mzuri inaweza isitoshe wakati gharama zinaongezeka, nguvu ya fedha ikipungua na wateja kuanza kubadili tabia zao za matumizi.

Kwa hiyo, swali si tu:

“Tutavukaje kipindi hiki?”

Bali pia:

“Tunawezaje kuitumia hali hii kuijenga kampuni itakayokuwa imara zaidi baada ya kipindi hiki?”

Karibu tujifunze.

MAMBO YA KWANZA CEO ANAPASWA KUYAFAHAMU

1. Kubali kwamba mazingira yamebadilika

Hatua ya kwanza ni kukubali kwamba kampuni ipo katika mazingira ya mfumuko wa bei na uchumi mgumu.

Kukubali hali hiyo hakumaanishi kukata tamaa.

Kunamaanisha kubadili mtazamo, mikakati na namna ya kufanya maamuzi ili kuendana na mazingira mapya.

2. Punguza hatari katika mnyororo mzima wa biashara

Mabadiliko ya mikakati yanapaswa kuangalia si kampuni pekee, bali pia:

• Wateja.
• Wasambazaji.
• Wawekezaji.
• Wafanyakazi.
• Washirika wa biashara.
• Mnyororo mzima wa thamani.

Kampuni inaweza kuwa na mpango mzuri lakini ikaanguka kwa sababu mshirika mmoja muhimu katika mnyororo wake ameshindwa kuendelea.

3. Linda fedha taslimu

Mfumuko wa bei unaweza kupunguza nguvu ya fedha taslimu na kuongeza mahitaji ya fedha katika uendeshaji wa biashara.

Kwa hiyo, CEO lazima awe na uelewa wa karibu wa:

Fedha inaingia kiasi gani?
Inatoka kiasi gani?
Inaenda wapi?
Na kampuni inaweza kuendelea kwa muda gani ikiwa mapato yatapungua?

Katika kipindi kigumu, cash flow si jambo la kuachia kitengo cha fedha pekee.

Ni ajenda ya CEO.

MAMBO MATANO YA KUKAZIA MACHO WAKATI WA UCHUMI MGUMU

4. Linda mtiririko wa fedha

Kampuni inahitaji kuhakikisha fedha inaendelea kuingia bila kukwama.

Hili linaweza kuhitaji:

• Kuongeza ubunifu.
• Kuimarisha matangazo na mauzo.
• Kupitia upya bei.
• Kupunguza gharama zisizo za lazima.
• Kulinda mwendelezo wa biashara.

Usiangalie mauzo pekee.

Angalia pia mauzo hayo yanabadilika kuwa fedha taslimu kwa kasi gani.

5. Iweke biashara kidigitali

Usichelewe kutumia teknolojia katika maeneo ambayo inaweza kuongeza ufanisi.

Mifumo ya kidigitali inaweza kusaidia katika:

• Mauzo.
• Ufuatiliaji wa wateja.
• Fedha.
• Taarifa za biashara.
• Mawasiliano.
• Usimamizi wa shughuli.

Lengo si kutumia teknolojia kwa sababu ni ya kisasa, bali kutumia teknolojia pale inaposaidia biashara kufanya kazi kwa ufanisi zaidi.

6. Ondoa vikwazo kwenye mnyororo wa usambazaji

Katika mazingira ya gharama zinazopanda, kuchelewa kwa malighafi au bidhaa kunaweza kuongeza gharama zaidi.

CEO anapaswa kufahamu wapi kuna vikwazo katika mnyororo wa usambazaji na kufanya kazi kuviondoa.

7. Weka ubunifu karibu na mteja

Ubunifu usiwe jambo la kuzungumzia kwenye mikutano pekee.

Jiulize:

Mteja anahitaji nini sasa?
Yuko tayari kulipia nini?
Tunaweza kumsaidia kwa namna gani bora zaidi?

Hapo ndipo ubunifu unapaswa kuelekezwa.

8. Usipuuze matengenezo

Kukwepa gharama za maintenance leo kunaweza kuleta gharama kubwa zaidi kesho.

Katika kipindi ambacho fedha ni muhimu, ni rahisi kuahirisha matengenezo ili kuokoa fedha.

Lakini baadhi ya matengenezo yanapocheleweshwa, yanaweza kusababisha hasara kubwa zaidi baadaye.

USIACHE KUJENGA KESHO

9. Endelea kuangalia wakati ujao

Uchumi unapokuwa mgumu, kampuni inaweza kujikuta ikiishi kwa ajili ya kuokoa leo pekee.

Lakini CEO anapaswa kuendelea kujiuliza:

“Tunataka kampuni hii iwe wapi baada ya miaka kadhaa?”

Usiharibu uwezo wa kampuni wa kesho kwa sababu ya changamoto ya leo.

MAMBO AMBAYO CEO ANAPASWA KUYAJUA

10. Fahamu namba halisi za biashara

CEO anapaswa kuwa na uelewa wa:

• Ukuaji halisi.
• Mapato halisi.
• Faida halisi.
• Wateja wanaofaa.
• Mzunguko wa fedha taslimu.

Usiongozwe na ripoti nzuri kwenye karatasi wakati fedha halisi haipo.

11. Simamia malipo ya wateja

Uhusiano mzuri na wateja ni muhimu, lakini kampuni pia inahitaji fedha zake kwa wakati.

CEO anapaswa kuwa na mfumo wa kufuatilia madeni ya wateja na kuhakikisha masharti ya malipo yanaeleweka na yanafuatwa.

12. Fanya kazi kwa karibu na CFO

CEO na CFO wanapaswa kujadili:

• Fedha itapatikanaje?
• Itatumika wapi?
• Kiasi gani kinapaswa kubaki?
• Kampuni inaweza kunyumbulika kwa kiwango gani?
• Bei zinapaswa kubadilishwa vipi?
• Ni maeneo gani yanahitaji uwekezaji?

CFO anapaswa kuwa mshauri muhimu wa CEO katika maamuzi ya kifedha.

MAWASILIANO YA CEO WAKATI WA UCHUMI MGUMU

13. Wasiliana, wasiliana, wasiliana

Katika kipindi cha kutokuwa na uhakika, watu huanza kujaza mapengo ya taarifa kwa makisio.

Ndiyo maana CEO anapaswa kuwasiliana mara kwa mara.

Wafanyakazi wanapaswa kuelewa:

• Kampuni iko katika hali gani.
• Changamoto ni zipi.
• Hatari ni zipi.
• Kampuni inafanya nini.
• Kila mtu anatakiwa kuchangia nini.

14. Wasiliana kwa uwazi na uzito

Mawasiliano ya CEO si kutoa taarifa tu.

Ni kuwasaidia watu kuelewa hali halisi na namna wanavyopaswa kuitikia.

Usifiche changamoto kwa matumaini kwamba watu hawatajua.

Wape ukweli unaohitajika ili waweze kufanya maamuzi sahihi.

15. Pima kama ujumbe umefika

Baada ya kuwasiliana, jiulize:

Kwanza: Ujumbe umefika kwa watu uliowalenga?

Pili: Wameuelewa na wameitikia kwa namna iliyotarajiwa?

Tatu: Ni mabadiliko gani ya tabia au utendaji yameonekana baada ya ujumbe huo?

Mawasiliano mazuri hayapimwi kwa kusema tu.

Yanapimwa pia kwa kile kinachotokea baada ya kusema.

16. Pokea taarifa moja kwa moja

CEO anapaswa kuwa na njia za kupata taarifa kutoka kwa watu walio karibu na ukweli wa biashara.

Zungumza moja kwa moja na:

• Wateja.
• Wauzaji.
• Wafanyakazi.
• Wazalishaji.
• Wasambazaji.

Usiruhusu taarifa zote zikufikie baada ya kuchujwa na ngazi nyingi za uongozi.

17. Wape watu nafasi ya kusema

Zungumza na timu kuhusu:

• Bidhaa mpya.
• Mawazo mapya.
• Ubunifu.
• Changamoto.
• Fursa.

Na muhimu zaidi, tengeneza mazingira ambayo watu wanaweza kusema wanachofikiri bila kuogopa.

18. Waeleze watu kinachoendelea

Usidhani kwamba wafanyakazi wanajua hali ya kampuni.

Waeleze:

“Hivi ndivyo uchumi ulivyo. Hivi ndivyo kampuni yetu ilivyo. Na hivi ndivyo tunavyopanga kukabiliana na hali hii.”

Uwazi hujenga uelewa na uwajibikaji.

19. Tafuta wawekezaji sahihi

CEO anapaswa kujenga mahusiano na wawekezaji ambao wanaelewa biashara na wanaweza kuendelea kuunga mkono kampuni katika mazingira magumu.

MAUZO NA UPANGAJI WA BEI WAKATI WA MFUMUKO WA BEI

20. Bei lazima iendane na soko

Upangaji wa bei haupaswi kufanywa kwa hisia.

Angalia:

• Gharama.
• Mahitaji.
• Washindani.
• Thamani kwa mteja.
• Uwezo wa mteja kulipa.
• Faida inayohitajika.

21. Usichelewe kupandisha bei unapolazimika

Gharama zinapopanda, kuchelewa kurekebisha bei kunaweza kuendelea kula faida ya kampuni.

Kabla ya kupandisha bei, fahamu:

• Kwa nini bei inapanda.
• Bei mpya itakuwa kiasi gani.
• Mteja ataathirika vipi.
• Washindani wanafanya nini.
• Kampuni inaweza kupunguza gharama kwa namna gani.

Kama wateja hawakubali bei mpya, usikimbilie kudhani kwamba suluhisho ni kurudi tu kwenye bei ya zamani.

Fanya utafiti.

Chunguza soko.

Pitia gharama.

Kisha tengeneza mpango unaowezekana.

22. Si kila mteja ni mteja sahihi

Kauli kwamba “mteja ni mfalme” haimaanishi kwamba kila mteja anapaswa kubaki kuwa mteja wa kampuni kwa gharama yoyote.

CEO anapaswa kujua:

Ni wateja gani wanaongeza thamani?
Ni wateja gani wanatumia rasilimali nyingi kuliko thamani wanayoleta?

Katika mazingira magumu, uteuzi wa wateja unakuwa muhimu zaidi.

23. Wafahamu washindani

Jua:

• Nani amepandisha bei.
• Nani hajapandisha.
• Kwa nini wanafanya hivyo.
• Wateja wao wanaitikiaje.

Na unapobadilisha bei, mteja anapaswa kuelewa thamani inayosababisha mabadiliko hayo.

24. Usichanganye ukuaji na afya ya biashara

Kampuni inaweza kukua kwa mauzo lakini ikawa inazalisha cash flow dhaifu.

Kwa hiyo usiangalie:

“Tumekua kwa asilimia ngapi?”

Angalia pia:

“Fedha halisi imeongezeka kwa kiasi gani?”

Madeni makubwa ya wateja yanaweza kufanya ukuaji wa mauzo usionekane katika fedha taslimu.

25. Punguza bidhaa zisizo na umuhimu

Kama kampuni ina bidhaa nyingi, chunguza ni zipi ambazo soko linahitaji kweli.

Katika mazingira magumu, kuendelea kuzalisha au kuhifadhi kila kitu kunaweza kufunga fedha kwenye bidhaa zisizozunguka.

26. Angalia fedha halisi, si namba za karatasi pekee

Kila uamuzi wa kifedha unatakiwa kuchunguzwa kwa kuangalia:

“Hii inaleta fedha halisi kiasi gani, na lini?”

Faida iliyo kwenye karatasi si sawa na fedha iliyo kwenye akaunti.

MAJUKUMU YA CFO WAKATI WA MFUMUKO WA BEI

27. Simamia mtiririko wa fedha

CFO anapaswa kufahamu:

Fedha inatoka wapi?
Inaenda wapi?
Kiasi gani kinapatikana?
Kiasi gani kinahitajika?

28. Tumia mifumo ya kidigitali

CFO anapaswa kuwa na mfumo unaowezesha kampuni kuona kwa wakati:

• Fedha inayoingia.
• Fedha inayotoka.
• Madeni.
• Gharama.
• Mapato.
• Mahitaji ya fedha yajayo.

29. Simamia madeni

Katika mazingira ya mfumuko wa bei, gharama ya fedha inaweza kuwa muhimu zaidi.

CFO anapaswa kuelewa kiwango cha madeni ya kampuni, masharti yake na uwezo wa kampuni kuyahudumia.

30. CFO afanye kazi karibu na idara nyingine

CFO hapaswi kuwa mtu anayekaa kwenye ofisi ya fedha pekee.

Anapaswa kushirikiana na:

• Mauzo.
• Masoko.
• Uzalishaji.
• Ununuzi.
• CEO.

Lengo ni kuhakikisha maamuzi ya fedha yanaendana na uhalisia wa biashara.

Na muhimu:

CFO ni mshauri wa kifedha wa CEO; si mbadala wa CEO.

CEO anapaswa kusikiliza ushauri wa CFO, kuuchambua na kisha kufanya maamuzi yanayohitajika.

RASILIMALI WATU NA CHRO

31. Walinde watu muhimu

Katika kipindi kigumu, si wafanyakazi wote wana mchango unaofanana katika biashara.

CEO na CHRO wanapaswa kutambua watu wenye mchango mkubwa na kuhakikisha wanabaki na motisha na uelewa wa mwelekeo wa kampuni.

32. Linda watu dhidi ya hofu isiyo ya lazima

Kampuni inapolazimika kufanya mabadiliko ya wafanyakazi, mchakato huo unapaswa kufanyika kwa utu, uwazi na heshima.

Watu wanahitaji kuelewa kinachoendelea badala ya kuachwa na hofu na uvumi.

33. Waelimishe wafanyakazi kuhusu mazingira mapya

Wafanyakazi wanapaswa kuelewa:

• Mfumuko wa bei unaathirije biashara?
• Gharama zimebadilikaje?
• Wateja wamebadilikaje?
• Kampuni inataka kufikia nini?
• Kila mfanyakazi anaweza kuchangia nini?

Mafunzo yanapaswa kusaidia watu kuona uhusiano kati ya kazi yao na matokeo ya kampuni.

34. Jadili stahiki za wafanyakazi kwa uhalisia

CEO na CHRO wanapaswa kuangalia kama kampuni inaweza kuongeza stahiki za wafanyakazi kulingana na mazingira yake.

Kama inawezekana, panga namna ya kufanya hivyo.

Kama haiwezekani, eleza sababu kwa uwazi na heshima.

BODI YA KAMPUNI

CEO na CFO wanapaswa kuiweka Bodi kwenye picha kuhusu:

• Hali ya kifedha.
• Mabadiliko ya soko.
• Hatari zilizopo.
• Hatua zinazochukuliwa.
• Mahitaji ya mtaji.
• Matarajio ya kampuni.

Bodi inahitaji taarifa sahihi ili iweze kufanya mapitio, kutoa ushauri na kufanya maamuzi yanayohitajika.

Pia, katika kipindi hiki, kampuni haipaswi kupuuza:

• Sheria.
• Usambazaji.
• Uzalishaji.
• Usimamizi wa matawi.
• Mawasiliano ya ndani.

Taarifa muhimu zinapaswa kushuka kutoka uongozi wa juu hadi kwa wafanyakazi wanaotekeleza kazi kila siku.

Mfumuko wa bei hauhitaji CEO kukaa na kusubiri uchumi urudi kuwa mzuri.

Unahitaji CEO anayejua namba, wateja, watu, gharama, mauzo na cash flow.

Katika kipindi kigumu:

Linda fedha.
Elewa mteja.
Pitia bei.
Dhibiti gharama.
Ondoa vikwazo.
Tumia teknolojia.
Boresha bidhaa.
Wasiliana mara kwa mara.
Sikiliza taarifa kutoka kwenye mstari wa mbele.
Weka timu kwenye mwelekeo mmoja.
Na endelea kujenga kesho huku ukisimamia leo.

CEO mzuri katika mazingira magumu si yule anayejifanya hakuna tatizo.

Ni yule anayelitambua tatizo mapema, analielewa, analizungumza kwa uwazi na kuiongoza kampuni kuchukua hatua kabla tatizo halijawa kubwa zaidi.

Kila la kheri, ndugu CEO.